نا سرجمیں واب
وھدءِ کہ لبزءِ واب پدر بیت بزاں کہ آئی ءِ پشتءَ بازیں ھیالءُ لیکہءِ بندوک اِنت، واب گیشتِر مردم شپءَ وابءِ تہا گنداں ھمئے شپءِ واب برئے مردماں تُرسین انت ءُ برے کندین انت ءُ برئے بادشاہ کن اَنت ءُ برئے پکیر،
بلئے بازار بری مردم روچءَ آگہی ءَ واب گندایت ھمئے چم پچی واب مردمءَ سک جیڈگءَ پرما ایت،
دوہزار شش ءِ(2006) اگستءَ ماہءَ من وتئ ڈگار ءِ مزن شاھیں ءُ مزن سائگیں تشّ ءِ سارتءِ سائگ ءَ نشتگتاں ءُ من یک وابءِ دیست، کوشءِ سارتیں کَشگ ءُ کپوت ءُ شانتلانی کُو کُو گوشئے منی وابءَ تعبیر کنگءَ اِت اَنت ءُ موسم ءِ زیبائی ءُ ڈولداری منءَ گیشتِر گپ ءُ ترانءَ پرمائگءَ اَت، منی چپءُ چاگِرد ءَ کس نیست اَت بس کپوتانی کُوکُو اَت، ایوکی ءِ وتئ یک مَزاءِ تہنائی مردمءَ سک باز جیڈگءَ پرمائیت، اے منی نودربری زمانگ اَت اے زمانگ ءَ من گْوادرءِ یک نامی گرامی انگلش لینگویج سنٹر "Bright"ءَ وانگءَ اِت اَنت۔
ءُ ھمئے ھاموشیءَ ءُ تہنائی ءَ چے من پائدگ زُرت ءُ وتءَ گوں وت انگلش گپءُ تران ءَ لگت اَنت، بلئے منءَ سَک تُرسگءَ اَت کہ من ءَ وتئ سَرا وت کس گپءَ منگداِیت، من پاداتک اَنت اے نیم ءُ آ نیم چاراِت ءُ پدا نشت اَنت گوں وت انگریزی گپءَ لگت اِت اَنت، من جیڈ اِت کہ مھلوک منءَ بگنداِیت گُشی گنوُک ءِ ءُ پدا منی واجہءِ کماشءَ ھال دایاں ءُ واجہ ءَ منءَ سنٹر روگ ءَ نہلیت،
اجبیں دُگنیا ءِ گندے مردمے گپءِ جانگءِ سرا پابندی اِنت، ءُ گوں وت گپ جانگ گُشئے مَستریں جُرم ءِ مھلوک ترا ریٹهـ ءُ ابدال لیک اِیت،
من جیڈ اِت کہ ناکامی ءِ اولی تبکّ ھمئے مھلوکءَ چے تُرسَگ اِنت، اگاں مھلوک ءِ کلاگاں گوش بدار اِت گُڈاں سک پُشتءَ کپءِ، تو وتءَ وت کدی بدلی کُتّ نہ کن اِت، گڈاں من کَسِی پرواہ نہ کُت کَمُو پُرشتگیں انگلشءَ گپ جت۔
انگلش دربرگ ءِ وھدءَ منی سنٹرءِ استاد سر شاھد اشرپ ءَ منی باز کُمکّ کُتگ، ءُ "Bright" سنٹرءَ چے منی دلءَ وانگ ءِ ھُبّ پیداک بیتّ ءُ من دیمتِر ءَ وانگ ءُ زانگ ءِ واست ءَ 2009 ءَ کراچی ءَ شُت اَنت، کراچی مئے بلوچ نودربرانی واست ءَ وانگ ءِ گَڈ بزاں(Hub of education) زانگ بیت، پرچہ کہ ما لندن ءُ دگہ دَرملکاں شُت نکن اِنت باز مشکل ءِ سرءَ کراچی ءِ وانگجاھاں سربئیں۔
کراچی ءَ من وتئ وانگ کراچی شاہ دربرجاہ ءَ سوشل ورک ڈیپارٹمنٹ ءَ چے بندات کُت ءُ اَود ءَ منءَ ادارہءَ چہ گیش مردماں چے بازیں چیزے دربرگ ءِ موہ مِل اِت، مئے سوشل ورک ڈیپارٹمنٹ ءَ مارا گیشتر چاگِرد ءِ بہتر ءُ ڈولدار کنگءِ سکن دات۔
وھدے کہ چاگِرد ءِ ذکر بیت ءَ گُڈاں گنجیں گوادر، منی ھلک ڈھور ءُ سرجمیں بلوچستان ءِ بزگی یاد اتکگ، من جیڈاِتگ ما پرچہ بزگ اِنت ما چیا پُشت ءَ کپتگیں ما چیا بے وانند اِنت، مئے جوان پرچہ نشہ ءِ آماچ انت ؟
پدا من لیک اِتگ اے جُستانی پَسُوءَ ارزان اَنت چُشیں بلوچ ءِ نیست کہ بلوچستان ءِ بزگیءِ سبب ءَ مزاں،
اے بے کاری، بے وانندئی، بزگی، نشہ اے دُرست مئے سرا "مسلط" کنگ بیتگ اَنت،
پدا من وتءَ وت جُست کت کہ منی کرد چی اِنت من چی کت کناں؟
گُڈاں ھما روچءَ چے من ارادہ کت کہ من وتئ میتگ ءَ یک وانگجاہ ءِ پچ کن اَنت ءُ وتئ ھلکے گُونڈواں وانیناں ءُ دیم ءَ وانگ ءِ واست ءَ سرپدی دایاں۔
بلئے اے یک وابی ءَ من دیستگ اَت وابانی سرجم بوھگ مشکل اِنت۔
وھد جنزاں بیت ماہ ءُ سال بدل بیت اَنت ما گوں یونیورسٹی ءَ وت ءَ دست گٹّ کُتگ ات، بَرے بَرے منی دوستیگیں سنگت انجینئر نبیل رشید ھم مئے کوٹیگءَ اتکگ اَت ءُ مارا وانگ ءِ بابت ءَ سر سوج ءُ سرپدی داتگتے برے برے ما چاگردی اڈّ ءُ جنجالانی سرا ھم گپءُ تران کُتگ اَت،
یونیورسٹی ءَ چے ماسٹر کنگ ءَ پد من گوں بازیں اُمیتی ءَ وتئ ھلکہ واتر بیت اَنت۔
مئے میتگ ءَ نوک نوکیں ماڈی ءُ دکان بَنتِِگ اَت بازیں سنگتی ءَ نوکیں سائیکل ءُ گاڈی گون اَت من ءَ وشی بوت کہ چاگِرد بدل بوتگ بلئے چیزے روچءَ رندا منءَ شبہ بوت کہ مھلوک زہنی Mentally بدل نہ بوتگ، ھما بے وانگی اِنت گونڈو گوں کُکُڑ ءُ بینکو میڈینگءَ دست گٹ ات اَنت وانگ ءُ زانگءِ کس ھیال ءَ نہ اِنت،
چاگِرد تہا بدلی آرگ سک مشکل انت، ھمئے چاگِرد تہا کار کنگ واست ءَ من وتءَ سالءِ کَپی ءَ گوں گْوادر کلب آر سی ڈی سی ءَ (RCDC) ھم گرنچ کُت، آر سی ڈی سی گْوادر ءِ تہا یک نامی گرامی ادارہءِ اے ادارہ ءَ چے مردمءَ باز چیزّ سکگءَ ملیت، آر سی ڈی سی سینیئر سنگتاں چاگِردی کار کنگ واستءَ منءَ باز دلبڈی ءُ حوصلہ داتگ۔
آکِر یک ستمبر دوہزار پانزدہ ءَ (2015) یک جْوانیں بدلی ءِ آؤرت اے بدلی آرگ ءَ منی ھلکے جْوانیں مہروانیں ءُ تعلیم دوستیں سنگتانی دست مان اَت آہانی تہا یکے سر جاوید مولابکش ءَ کہ واجہ ھچ تعریفءِ محتاج نہ اِنت، واجہ ءِ کُمک ءُ سر سوجاں بغیر ڈھور وانگجاہ ءِ (DGELCC)وجود ممکن نئیت۔
واجہ اے سپر ءِ اولی مردماں چے یکے کہ روچءِ مرچی واجہ کُمکّ، دلبڈی، گُونڈوانی سرءُ سوج کنگ، سنٹرءِ دیمرئی کنگ ءَ واجہ دست مان اِنت۔
واجہ مسلم گلام ءُ یوسف حاجی اسمائیل ھم پراموش کنگ نہ بنت واجہانی جُہد پہ بنداتی کلاسانی ٹہینگ ءَ نودربرانی واستءَ وھد کشگ ءُ ادارہءِ مُھکم کنگءَ واجہاں منی ھمبرا داری کُتگ۔
یک ستمبر دوہزار پانزدہءَ 2015 منی واب ءِ بُن ھشت ایر کُت، سپر چمدءَ چے بندات بوتّ، نی واب گوں دارجیں سپریءَ بندوک اِنت، اے سپر چندءِ روچ ءُ چیزے سالے نہ اِنت، اے سپر ءِ واستءَ مُھکم بُوگی اِنت سکیءُ سوری برداشت کنگی اِنت دلجم بُوگی اِنت، ھبر ءُ چاگردی تژن سَگاگی انت۔
ھمئے سپرءِ واست ءَ ما وتئ لانک بست ءُ جنزاں بُوت اِنت، اے سپرءَ گوں بازیں ھُُب ءُ واھگے بندوک اِنت اے سپرءِ مولءُ متاه چاگِرد ءِ تہا وانگ ءُ زانگی سرپدی آرگی اِنت، ما زانت کہ ما انچو لائِک نہ اِنت کہ جوان ءِ وڈی ءَ وانگ ءُ زانگی سرپدی بدیں، بلئے "ھرچ مرگ بال ءِ وت" ءُ ما وتئ کدءَ کوشست کن اِنت، ما انچو جہد ءُ کوچست الم کن اِنت کہ اگاں مئے گونڈو جْوانیں وڈی ءَ انگریزی گپ کت نکن اَنت بلئے ضرور پہم اَنت۔ ءُ ڈھور گھٹی انگش لینگویج سنٹرءِ مُولّ ءُ متاه تہنا اے نہ اِنت کہ بس گونڈو انگریزی بزان اَنت، بلکیں نودربرانی تہار سرپدی آرگ، آہاں دیمتِر وانگ ءِ واست ءَ سکن دایگ ءُ دَری وانگجاہان روگ ءِ دلبڈی دایگ ءُ وانگ ءِ کدرءُ کیمت ءِ بابت ءَ سرپدی دایگ اے درست مئے مُولّ ءُ متاہانی تہہءَ ھوراَنت۔
اَلحَمدُاللہ کسانیں مدتی تہءَ ڈھور گھٹی وانگجاہ ءَ وتئ واست ءَ یک جْوانیں نام ءِ پیداک کُتگ ءُ ڈھور گھٹی وانگجاہ ءَ بازیں نودربر ءِ دلبڈی داتگ مارچی مُلکءِ مزنیں شادربرجاہاں وانگ اَنت، ءُ اے مئے واب اِنت کہ ڈھور گھٹی وانگجاہ بلوچ چاگِرد ءِ کدمتءِ واست ءَ جْوانیں انسان پیداک کنت،
ما سرپدیں کہ اے واب انچو پہ وشی سرجم نہ بیت، ناسرپدیں چاگِرد ءِ شر کنگ واست ءَ باز برداش کنگ کپیت، کدی مردم ملامت کنگ بیت کدی مرم ایرجانگ بیت، ءُ برے وسریں جنجال پیداک کنگ بیت،
اُمیت کناں کہ ڈھور گھٹی وانگجاہ اے سجائیں سکی ءُ سوریگاں برداشت کنت اوپار کنت ءُ سجائیں جنجالانی دیم ءَ مُھکم بیت ءُ اوشتی، ناکامی چے نہترس اِیت وتئ چاگِرد تہا یک جْوانیں بدلی کارایت ءُ منی واب ءَ سرجم کنت ۔
شمئے کستِر یارمحمد بشام
