تیابءِ دپءَ پیرزالے نشتگ

جاوید بلوچ

پیر زال ھمروچ کہ روچ ٹک دنت وتی گرنچءَ زیر ایت ءُ ھمے بُرزگءِ سرءَ نند ایت کہ ھمدا چی دریا سرجمءَ گندگ بیت، پیر زالءِ آہگءَ گوں میتگءِ سرجمیں چوریگ آئیءِ راستیں ءُ چپیں نیمءَ جم بنت، راہ گوزی ھمے سما کن انت کہ پیر زال چیز بہا کنت بلے انا پیر زال کسہ کاریت ءُ اشییءِ گرنچءِ تہا چی مان روچءِ مروچی کس نزانت،

آ شعرءَ معنا کنگءَ اَت کہ مردوماں توار پِر کُت بیائے میت ایر دئیگ بوتگ ھاک پریچ اتاں،
 مردوم وتی دُمبلاں چنڈان ھاک پریچگءَ روان بوتاں من اوں پاد اتکاں قبرءِ نزیک اتکاں چاراں قبرءِ دپ بچ انت توکءَ یک زنڈیں دپترے ایر انت ءُ ھمے کہ دمانے پیسر پیر زالءِ نام گرگ بئیگءَ ات دپترءِ سرءَ ھمیشیءِ عکس انت،

 من، منی چم، ھیال ءُ پہم ہر کس ھیران اِتاں

من لوٹ ات کہ معنا کنوکءَ جُست بہ کناں مُلا ءَ پہ جاک گُشت ءُ مردوم مہ کن کتاں کہ ھاکاں بلے ھمدءَ ایر انت شُمے کیسگءَ ہرچی است ھمیشاں قبرءَ پِریچ ئے

مردوماں گُش ئے زاناں پیسرءَ چی تیاری کُتگءَ ءُ وتی کیسگءَ چہ رنگ رنگی ایں قصہ کشگ ءُ قبرءَ پریچگءَ لگت اتاں

من معنا کنوکءِ دست گپت ءُ پُشتءَ کشت
"تؤ زان ئے پیر زالءِ گرنچءَ چی مان بیتگ؟"
معنا کنوکءَ منی بے تاہیریں جُستءَ پیسر من ءَ جُست کُت، من ھچ نہ گُشت

"کس اے گپءَ روچ مرچی ھم نزانت کہ آئیءِ گرنچءَ چی مان بوتگ بلے لوگءِ مردوم گشاں کہ اشییءَ وتی سرءِ ٹٹ ھچ بر ڈنءَ دَور نہ داتگ انت، نی ھدا بزانت..."

آئیءِ گپ سرجم نہ بوت کہ یکبرے پدا مردوماں کُکار کُت دعا انت، مردوم قبرءِ چپ ءُ چاگرءَ اوشتاتگ اتاں، چٹ ھاموشی بوت ایوکءَ مُلاءِ توار آئگءَ ات کہ دعا وانگءَ ات، من معنا کنوکءِ نزیک تر اتکاں آئیءَ منی گوشءِ تہءَ سُکسُک کنانءَ گُشت

" پیر زالءِ مزنیں واھگے بوتگ کہ قلندرءِ درگاہ ءَ بُرؤت، آ وداریگءَ کہ شعبانءِ پانزدہءَ کہ میڑہ بیت المءَ رؤت بلے نی وت میڑہءِ جوڑ بیت،"
من پادانی سرءَ نشتاں انچو بے وت بُوان بئیگءَ اتاں گُش ئے پیر زال منی اندرءَ ایر کپان انت، من آیت الکرسیءَ وانگءَ لگت آں انہگہءَ من ھیال کُت وتی پادءِ پینزءِ ترکاں چُنڈگءَ آں

چماں جست کناں چاراں معنا کنوک ادا نہ انت، قبرستان ھالیگ انت منءَ وسوسے ءَ پتات، من دِرک بست ھما بُرزگءِ نیمءَ کہ پیر زال نند ایت ،
من اتکاں چاراں چوریگ جم انت درستاں تسبی دستءَ انت وانگ ءُ پدا دریاءَ چُپ جَنگءَ اَنت ءُ گرنچ چولانی سرءَ لُڈگءَ اِنت.

ندر پہ غین نون گلءَ